Талдау нәтижелері 17-19 қараша күндері UMC клиникалық бөлімшелерінде Еуропаның танымал маманы, профессор Роберто Троиси жүргізген бауыр хирургиясы бойынша мастер-класс өтті. Роберто Троиси – MD, PhD, University Hospital Federico II (Неаполь, Италия) ауруханасының гепатопанкреатобилиарлық хирургия және трансплантация бөлімінің басшысы. Бұл шара Қазақстандағы трансплантология мен бауыр хирургиясының дамуына халықаралық тәжірибе, заманауи технологиялар және практикалық оқытуды біріктірген маңызды кезең болды.
Бауыр – толықтай регенерациялануға қабілетті адам ағзасындағы жалғыз орган. Сондықтан резекция мен трансплантацияның заманауи әдістерін дамыту медицина үшін ерекше маңызды. Ұсынылған мастер-класс білім алмасуға, біліктілікті арттыруға және озық тәсілдерді енгізуге мүмкіндік берген тиімді платформаға айналды.
Алғашқы күні профессор Троиси «Бауыр хирургиясындағы жаңа көкжиектер» атты лекция оқып, қазіргі әдістерді, даму үрдістерін және операциялық тәуекелдерді азайту мүмкіндіктерін таныстырды. Қатысушылар нақты клиникалық жағдайларды талқылап, сұрақтар қойды.
18 қараша күні, екінші күні, бауырдың сол жақ бөлігін лапароскопиялық резекциялау бойынша демонстрациялық операция өтті – UMC хирургтері сарапшының жұмысын бақылап, қолжетімділіктің ерекшеліктерін, анатомиялық нюанстарды және қадамдық техникасын бағалады. «Тікелей хирургия» форматы практикалық дағдыларды нақты уақыт режимінде меңгеруге мүмкіндік берді.
Қорытынды лекция сплит-трансплантацияға арналды – бір донорлық органды екі реципиентке бөлуге мүмкіндік беретін әдіс. Теориялық бөлімнен кейін Назарбаев Университетінің биомедициналық зерттеу орталығының жаңа виварийінде жануар моделінде практикалық сессия ұйымдастырылды.
Шара барысында ерекше назарды отандық құрылғы ALEM (Astana Life Ex-Situ Machine) аударды – бұл UMC Кардиоорталығы мен Heart Center Foundation бірлесіп әзірлеген инновация. Трансплантациялық манипуляциялар кезінде жануар моделінде қолдану барысында ALEM тұрақты әрі болашаққа үміт сыйлайтын нәтижелер көрсетті. Жоба шетелдік қатысушылардың қызығушылығын тудырып, органды сақтау саласындағы перспективалы ұлттық жаңалық ретінде жоғары бағасына ие болды.
Профессор Троиси өткізген мастер-класс – тәжірибе алмасудан да бөлек, Қазақстанда заманауи трансплантолог-хирургтар мектебін қалыптастырудағы маңызды қадам. Жаңа әдістер мен технологияларды меңгеру, ұлттық инновацияларды дамыту – мұның барлығы пациенттердің сенімін арттырып, медициналық жүйені нығайтуға және халықаралық деңгейге шығуға ықпал етеді.
UMC медицина, ғылым және әрбір пациенттің денсаулығына жаңа мүмкіндіктерді дамыту бағытында жұмысын жалғастыра береді.
